Todos coñecemos ben as mimosas, ou acacias, como lles queirades chamar. Esas árbores que despois de pasar un ano adormecidas, alá polos finais do inverno e comezo da primavera deciden colgarse os seus preciosos pendentes de brillantes dourados.
De pronto sorpréndenos o monte cubríndose con delicados pomponciños aterciopelados de rechamante cor amarela. Son as mimosas. Primeiras flores da primavera. Fragrantes e suaves coma un pano de seda dourado, perfumado cun inesquecible aroma.Toda unha explosión de cor e vida, con ese amarelo cálido brillante, contrastando co verde fresco da paisaxe invernal galega.
Con arbores a seu
carón, dos que aínda non empezaron a brotar as primeiras follas, as mimosas anuncian
a primavera dándonos un anticipo do que queda por vir. Espectáculo
inesquecible, son un auténtico regalo para os nosos sentidos!!
A mimosa é unha de
esas plantas que provocan amor para uns e odio para outros, incluso nalgunhas
persoas provocan amor e odio o mesmo tempo. Hai xente que as aborrece, con
razón, porque lles provocan unha tremenda alerxia. Hai tamén quen non soporta o
seu cheiro. Pero algunhas, como a que vos conta, nos encantan, ben porque
simplemente nos resulten espectaculares a vista, porque nos fascine a súa cor e
fragrancia, ou porque teñan un significado especial ou sentimental na nosa
vida.
De feito o perfume
que máis me gusta é Anaïs-Anaïs, por emotivos e sentidos motivos…, pero tamén porque no seu
arrecendo atopo certa semellanza a mimosa.
É unha delicia por exemplo facer unha viaxe dende Vigo
a Ourense nesta época, sobre todo cando nos imos achegando a zona do Ribeiro.
Igualmente podemos gozar dando un paseo tranquilamente pola beira do Miño na
cidade de Auria onde podemos admirar o entorno e nos dará a benvida o
sedutor cheiro das mimosas.
Tamén é verdade que
se trata dunha planta moi invasora e incluso nalgunhas zonas de Galicia, como é
o caso da comarca do Ribeiro, están a ter serios problemas con elas, xa que
ameaza ás especies autóctonas do entorno. De feito as extensións de mimosas nos
montes galegos cada vez son mais grandes. É unha magoa que produzan danos
no ecosistema porque é un verdadeiro pracer poder admirar os montes cubertos
por elas.
Unha curiosidade
sobre elas, que de seguro mais de un xa coñecedes, é que a mimosa non so é
mimosa, senón que ademais é moi tímida....as súas follas escóndense o contacto
dunha caricia. E moi sensible o tacto e ao mínimo contacto cas súas follas
estas contráense sobre o tallo como si se cerrara. É o seu mecanismo de defensa
contra posibles depredadores. Por iso que nalgunhas zonas lle chaman “non me
toques”.
Cada ano por estas
datas volven a min as mesmas sensacións cando o mirar cara o monte empezo
a albiscar as primeiras mimosas. Contemplalas en todo o seu esplendor así como
percibir o seu aroma, a min semelláseme como unha caricia na alma.
Pecho os ollos e
véxome en Ourense, na casa de meus pais en Barrocás, cando ao espertares pola
maña cedo abro a xanela e velas aí están!. Xa está o Monte-Alegre cuberto cas
mimosas en flor.
Sempre me gustou
ese monte coronado coa súa gran Cruz. Nesta época, cada venres corría a buscar un
bo ramo delas. Meu pai odiábaas, pero como sabía que a min me encantaban non me
dicía nada. Logo, como fan todos os pais, escoitábao dicíndolle a miña nai....
-“xa
esta a rapaza co demo das mimosas...anda muller, tíralle con elas”.
Nos nosos benqueridos
montes do Fial das Corzas coido que hai moi poucas, o menos de momento, pero eu
tiña a sorte de poder disfrutalas cada ano por primavera. Na estación de
Cerdedelo, case pegadas os carrís da vía do tren, hai un pandeiriño de terreo
cheo delas.
Lembro cada Semana Santa que iamos a pasar as vacacións a nosa casa en Porto Vilar, unha das primeiras cousas que facía era baixar a coller uns bos ramos delas para poder admiralas en casa…qué ledicia daquela!!
Lembro cada Semana Santa que iamos a pasar as vacacións a nosa casa en Porto Vilar, unha das primeiras cousas que facía era baixar a coller uns bos ramos delas para poder admiralas en casa…qué ledicia daquela!!
Dende sempre quixen
ter unha Acacia no xardín pero Manuel me dicía que era mellor que non, que
despois non nos daríamos desfeito delas. Teño que dicir que tiña moita razón,
pois un día por fin plantamos unha, que por certo se puxo preciosa, pero agora
saen milleiros delas a carón da que puxemos. Certamente son moi invasoras!!. Supoño que en breves non lle
quedará máis remedio que desfacerse dela…unha mágoa!!
Tamén lembro, inda
que xa se perdeu unha gran parte desa tradición, tanto en Trez coma en Cerdedelo,
o sábado de Semana Santa celebrábase a “noite das trampas”. Noite de ilusión,
xoldas e alegrías…
O caer a noitiña formábase
unha xuntanza de todos os mozos e mozas nunha gran cea con degustación de rico cabrito,
cordeiro e boas bicas, todo ben regadiño con bon viño e licor café.
Despois baile amenizado por a charanga de Cerdedelo. Pandeiros,
tambores, gaitas e panderetas…Por certo, tocaban moi ben todos eles. Claro que
o mellor, para min e sen desmerecer os demais, era Manuel. El arrincaba o son da gaita
galega dun xeito especial, tanto que era unha ledicia escoitalo…Benditas mans as súas que todo o facían ben!!
Cantas lembranzas cheas de vida, bo humor e ledicia!!
Logo os mozos argallaban as mil e unha enchendo de trampas toda a aldea: carros atrancando as rúas, cancelas que acababan no río, burros que cambiaban de curral, paredes recen feitas que pola maña aparecían esborralladas... etc.
E xa a iso da media
noite ían o río, ou regatos, a cortar o chopo mais alto para poñelo no medio do
pobo. Facían tremendas falcatruadas.
Esa noite
comportábanse como auténticos brutos cos veciños pondo todo na aldea patas a
riba, pero puñan toda a súa delicadeza e sensibilidade agasallando as mociñas
do lugar.
Antes de despuntar o día recollían tamén un
boa chea de mimosas... preparaban uns fermosos ramiños para cada moza, o que
mais e o que menos andaba a facerlle as beiras a algunha. Logo deixábannolos,
xunto cuns caramelos ou outras lambetadas, na xanela da alcoba, para que nos
atopásemos ca primavera e mailo amor nada mais levantarmos…
Pola mañá cando
toda a xentiña se levantaba armábase tremendo alboroto, os pais e veciños de
cada casa botaban pestes por todo o que os mozos argallaran na
ditosa “noite das trampas”, pero ...
As mozas andabamos
todas contentas coma cucos cos nosos ramiños e caramelos. Algunhas cheas de
ledicia quedabamos porque eran de noso amor. Outras tamén contentas por o
detalle de seus amigos e irmáns, ca esperanza de poder atopar tamén algún
día o agasallo de seu namorado...
Eu... sigo
soñando cas mimosas cada primavera...
No hay comentarios:
Publicar un comentario